Luminara-гийн нэрийн утга
Lumen ба Нар: Luminara гэдэг нэрийн цаана ямар санаа байдаг вэ?
LUMINARA-ГИЙН ТҮҮХ
10/2/20261 мин унших
Та нэг зүйлийг удаан ойлгохгүй явж байгаад гэнэт „Аан!" гэж бүх зүйл тодорхой болсон мөчийг санаж байна уу?
Надад тийм мөчүүд олон удаа тохиолдож байсан. Удаан хугацаанд хэцүү, хол санагдсан зүйл хэн нэгэн энгийнээр тайлбарлаж өгөхөд гэнэт бүх зүйл өөрөөр харагддаг. Ойлгомжгүй байсан зүйл тодорхой болж, „Аан, ийм учиртай юм байна" гэж бодогддог.
Luminara гэдэг нэрийн цаана яг ийм санаа бий.
Luminara гэдэг нэрийг латин хэлний lumen гэсэн үг болон Nara нэртэй холбон бүтээсэн.
Lumen гэдэг нь „гэрэл", „гэрэлтүүлэгч" гэсэн үндсэн утгатай бөгөөд үүнээс гадна юмсыг тодруулах, харах, ойлгохтой холбоотой өргөн утгыг агуулдаг.
Гэхдээ бидний хувьд гэрэл гэдэг нь зүгээр л гэрэлтэх тухай биш.
Харанхуйд гэрэл тусахад хүн хаашаа явахаа харж эхэлдэг. Төөрсөн үедээ замаа олж, өөрийн чигээ тодорхойлж чаддаг.
Мэдлэг ч бас ийм.
Бид ямар нэг зүйлийг мэдэхгүй байхдаа эргэлзэж, төөрч, заримдаа өөртөө итгэлгүй болдог. Харин зөв мэдлэгийг ойлгомжтойгоор хүлээж авахад аливааг өөрөөр харж эхэлдэг. Өөрийнхөө чигийг олж, шийдвэрээ илүү итгэлтэй гаргаж чаддаг.
Харин Nara гэдэг нэр миний хувьд зөвхөн өөрийн нэр биш. „Нар" гэсэн монгол үгтэй холбогдохдоо надад бүр илүү гүн утгатай.
Гэрэл замыг харуулдаг бол нар дулаацуулж, амьдрал өгч, өсгөдөг. Нар өдөр бүр дахин манддаг. Хэнийг ч ялгалгүй гэрэлтүүлдэг.
Тиймээс Luminara-гийн хувьд бид энэ хоёр санааг нэгтгэдэг.
Lumen — замыг тодруулах гэрэл.
Nara — дулаацуулж, өсгөж, амьдралд гэрэл нэмэх нар.
Бидний хүсдэг зүйл бол хүмүүст өмнөөс нь замыг нь сонгож өгөх биш.
Өөрийнхөө замыг харахад нь туслах.
Өөрийнхөө чигийг олоход нь туслах.
Ойлгосон зүйлээрээ өөртөө итгэлтэй болоход нь туслах.
Бидний хувьд гэрэл гэдэг нь мэдлэгийн бэлгэдэл төдий биш.
Энэ бол:
ойлгох,
чигээ олох,
өөртөө итгэх,
бусдад гэрэл болох тухай юм.
Бидний гол санаа маш энгийн:
Сайн мэдлэг ойлгомжтой байх ёстой.
Учир нь ойлгомжтой болсон мэдлэг хүний амьдралд бодит өөрчлөлт авчирч чадна.
Luminara — мэдлэгээр дамжуулан амьдралынхаа замыг илүү тод харахад туслах орон зай.
Luminara-г би санаачилсан бөгөөд одоо Эрдэнэчимэгтэй хамтдаа хөгжүүлж байна. Бид хоёр өөр өөрийн мэдлэг, туршлагаараа энэ гэрлийг илүү олон хүнд хүргэхийг хүсэж байна.